Onkoloji xəstəliklərin müalicəsi

Onkologiyada diaqnostik məqsədlə tətbiq edilən İnvaziv radiologiya üsulları ilə yanaşı, xərçəngi birbaşa müalicə edən üsullar da mövcuddur. Mikrodalğa ablasiya, kimyaembolizasiya, intraarterial kimyaterapiya, radioembolizasiya kimi üsullar xərçəng hüceyrələrinin birbaşa məhv edilməsi üçün invaziv radioloji tətbiqlərdir.

Transarterial embolizasiya (TAE)

Şiş (xərçəng və ya xoş xassəli) hüceyrəsinin qan təchizatını tamamilə bağlamaq və hüceyrə ölümünə səbəb olmaq, eləcə də qanamanı durdurmaq üçün embolik materialın (mikrohissəciklər, yapışqan, PVA) kateter vasitəsilə şişi qidalandıran arteriyalara yeridilməsi prosesidir. Məs: Uşaqlıq arteriyasının embolizasiyası (uşaqlıq mioması və ya uşaqlıq törəmələri qanamalarında), prostat arteriyasının embolizasiyası, qanayan törəmələrin damarlarının embolizasiyası, bəzi nahiyələrdəki hemangiomaların embolizasiyası.

Transarterial kemoembolizasiya (TACE)

Kimyaterapiya preparatının kateter vasitəsilə mikrohissəciklərlə birlikdə şişi qidalandıran arteriyalara yeridilməsi prosesidir. Bu zaman şiş hüceyrələrinə həm kimyaterapiya verir, həm də hüceyrə ölümünə səbəb olmaq üçün şişə qan tədarükünü bloklayırıq. TACE müxtəlif növ dərmanlarla həyata keçirilə bilər. Ən çox rezeketabl olmayan qaraciyər xərçənginin (hepatosellüler karsinoma) müalicəsində istifadə edilir.

Mərkəzi venoz kateter yerləşdirilməsi

Bunlarla bərabər onkoloji müalicələrin rahat icra edilməsi üçün mərkəzi venoz kateter (picc-line, port kateterlərinin) yerləşdirilməsi də invaziv radiologiyanın tətbiq etdiyi üsullardan biridir.